Әһәмиятле даталар

• 1890 нче ел — Казан сәнәгать училищесына нигез салыну
• 1919 нчы ел — Татарстан территориясендә беренче инженерлык югары уку йорты — Казан политехника институты төзелү
• 1930 нчы ел — Казан политехника институты һәм Казан дәүләт университеты физика-математика факультетының химия бүлеге базасында А. М. Бутлеров исемендәге Казан химия-технология институты (КХТИ) төзелү
• 1935 нче ел — Институтка С. М. Киров исеме бирелү
• 1980 нче ел — С. М. Киров исемендәге Казан химия-технология институтына (КХТИ) Хезмәт Кызыл Байрагы ордены тапшырылу
• 1992 нче ел — С. М. Киров исемендәге Казан химия-технология институты Казан дәүләт технология университеты итеп үзгәртелү
• 2011 нче елдан Казан милли тикшеренү технология университеты (КМТТУ) барлыкка килү.

Структурасы (төзелеше)

Казан милли тикшеренү технология университетында (КМТТУ) югары белем бирү программаларын гамәлгә ашыручы сигез уку институты бар:

• Инженерлык химия-технология институты (ИХТИ / ИХТИ);
• Химия һәм нефть машина төзелеше институты (ХНМТИ / ИХНМ);
• Инновацияләр белән идарә итү институты (ИбИИ / ИУИ);
• Нефть, химия һәм нанотехнологияләр институты (НХНИ / ИНХН);
• Полимерлар институты (ПИ / ИП);
• Азык-төлек җитештерү һәм биотехнологияләр институты (А-ТҖБИ / ИППБТ);
• Җиңел сәнәгать технологияләре, мода һәм дизайн институты (ҖСТМДИ / ИТЛПМД);
• Идарә, автоматлаштыру һәм мәгълүмати технологияләр институты (ИАМТИ / ИУАИТ).

Бу институтларда башлангыч югары белем (бакалавриат), махсус югары белем (специалитет), тулы югары белем (магистратура) программалары буенча белем бирелә.

Аннан тыш университетта эшлиләр:

• Өстәмә һөнәри белем бирү институты (ӨҺБИ / ИДПО; квалификация күтәрү, һөнәри әзерлек)
• Халыкара белем бирү программалары факультеты (ХБПФ / ФМОП; чит ил укучылары өчен өстәмә белем бирү программалары)
• Хәрби укыту үзәге (ХУҮ / ВУЦ).

Югары белем бирү программаларын (магистратура) КМТТУның «Промхимтех» алдынгы инженерлык мәктәбе гамәлгә ашыра.

КМТТУ филиаллары булып түбәндәге белем бирү оешмалары тора:

• Түбән Кама химия-технология институты (ТКХ-ТИ / НХТИ, югары белем бирү программалары — бакалавриат, магистратура һәм урта һөнәри белем бирү программалары, өстәмә һөнәри программалар);
• Бөгелмә филиалы (БФ / БФ, югары белем бирү программалары — бакалавриат);
• Казан технология көллияте (КТК / КТК, урта һөнәри белем бирү программалары);
• Химияне (башлангыч, гомуми һәм урта белем бирү программаларын) тирәнтен өйрәнүче сәләтле балалар өчен лицей-интернат («КМТТУ» ЮБ ФДБМУ ЛИ / ЛИ ФГБОУ ВО «КНИТУ»).

Шулай ук:

• «Союзхимпромпроект» проект институты (Россия һәм чит ил заказчылары өчен, сәнәгатьнең төрле тармакларындагы җитештерү объектларын комплекслы проектлау).

Безнең хакта

Казан милли тикшеренү технология университеты (КМТТУ / КНИТУ) — 1890 нчы елда Казан сәнәгать училищесы — фабрика-завод җитештерүләре өчен, түбән һәм урта дәрәҗәдәге кадрлар әзерләүгә юнәлдерелгән махсуслаштырылган уку йорты буларак нигезләнә. Сәнәгать училищесында белем бирүнең асылында ике зур фәнни-мәгариф өлкә — химия һәм механика юнәлешләре аерым роль уйный. Әлеге тармаклар бүген дә университет өчен алдынгы юнәлешләр булып санала.

Училищеның яхшы җиһазландырылган матди-техник базасы, сыйфатлы мөгаллимнәр составы, укучыларда нигезле белем базасын формалаштыруга һәм конкрет гамәли күнекмәләр алуга юнәлдерелгән тирән белем бирү программасы булу — уку йортының тиз һәм сыйфатлы үсешенә ярдәм итә.

Мисалга: 1919 нчы елда училище базасында Татарстан территориясендә беренче Инженерлык югары уку йорты — Казан политехника институты барлыкка килә, ә 1930 нчы елда политехника институты һәм аңа кушылган Казан дәүләт университетындагы физика-математика факультетының химия бүлеге базасында (аның, 1830 нчы еллардан башлап, дөньякүләм танылган Казан фәнни химия мәктәбе буларак үсеш алганлыгы билгеле) Казан химия-технология институты төзелә. Ул 1970—1980 нче елларда СССРның әйдәп баручы дүрт химия-технология югары уку йортларының берсенә әверелә һәм 1992 нче елда Казан дәүләт технология университетына, ә 2011 нче елда Казан милли тикшеренү технология университетына үзгәртелә.

Университет яшәеш дәвамында илебез сәнәгате өчен квалификацияле кадрлар әзерләүгә юнәлдерелгән югары уку йорты булды һәм шулай булып кала да. Хәзерге вакытта КМТТУ химия технологиясе өлкәсендә тармак масштабындагы беренче университет — икътисадның реаль секторы вәкилләре белән тыгыз интеграциядә эшләүче, химия тармагы һәм оборона-сәнәгать комплексы үсешенең актуаль ихтыяҗларын һәм бурычларын хәл итәргә сәләтле, алдынгы заманча инженер белем бирүче, фундаменталь һәм гамәли фәннәр үзәге булырга омтыла.

Бүген бу уку йорты — нефть-газ химиясе, полимер химиясе, махсус химия өлкәсендә югары квалификацияле инженер кадрлар әзерләү һәм фәнни тикшеренүләр уздыру буенча Россиянең әйдәп баручы университетларының берсе. Ул машина төзелеше, нано- һәм биотехнологияләр, IT, җитештерүне автоматлаштыру, җиңел промышленность һәм азык-төлек сәнәгате, тармак икътисады өлкәсендә ышанычлы позициядә тора. Уку йортында гыйлем һәм тәрбия алучылар саны — 20 меңнән артык (чит ил гражданнары — ике меңнән артып китә).

КМТТУ Times Higher Education World University исемендәге дөньяның иң яхшы университетлары рейтингына керә (Россиядагы 103 университет белән бергә), QS World Riversity Rankings 2023 дөнья рейтингына да кертелә (Россиядагы 47 университет белән бергә), Round University Ranking дөньяның әйдәп баручы университетлары рейтингында — 131 дән 67 нче позициядә. «Университетның өч миссиясе» (2021) исемендәге Мәскәү халыкара университетлар рейтингында КМТТУ:

• илнең җиңел сәнәгать технологиясе өлкәсендә — 7 югары уку йорты арасында — беренче;
• азык-төлек технологияләре өлкәсендә — 20 уку йорты арасында — өченче;
• химия технологияләре өлкәсендә — 20 уку арасында — җиденче;
• биотехнология һәм биоинженерия өлкәсендә — 20 уку йорты арасында — тугызынчы урынны алып тора.

Казан милли тикшеренү технология университетының Россия һәм чит ил заказчылары белән актив эшләүче «Союзхимпромпроект» проектлар институты бар. Ул куркыныч тудыручы җитештерү объектларына сәнәгать куркынычсызлыгы экспертизасын ясау, аның проект документациясен булдыру белән шөгыльләнә, генераль проектлаучы функцияләрен башкара.

КМТТУның мөһим сәнәгать партнерлары булып «Газпром» ГАҖ (гавами акционерлык җәмгыяте), «СИБУР Холдинг» ГАҖ, «Аммоний» АҖ (акционерлык җәмгыяте), «РТСИМ» ҖЧҖ һәм «Системалы карарлар» ҖЧҖ (җаваплылыгы чикләнгән җәмгыять) IT-компанияләре санала.

Университет «Приоритет-2030» (грантның база һәм махсус өлеше) һәм «Алдынгы инженерлык мәктәпләре» федераль проектларын гамәлгә ашыруда катнаша. «Приоритет-2030» федераль программасы кысаларында «Россия икътисадының оборона сәләтен һәм иминлеген тәэмин итү» һәм «Стратегик билгеләнештәге полимерлар» проектлары эшләнелә. Университетның «Промхимтех» алдынгы инженерлык мәктәбе ябу (чикләү) тибындагы сәнәгать химия технологияләрен эшләүдә, ягъни аз тоннажлы химия продуктларына бәйле партнер компанияләрнең технологик чылбырларының тотрыклылыгын тәэмин итүдә, химик юнәлештәге югары технологияле компанияләрне үстерүдә һәм яңаларын төзүдә махсуслашкан проект.

Югары уку йортының фәнни эшчәнлеге Россия Федерациясенең фән, технологияләр һәм техника үсешенең өстенлекле юнәлешләрен чагылдырган 15 төп фәнни юнәлешне үстерүче танылган фәнни мәктәпләр тарафыннан тәкъдим ителә. КММТУда фән тарихы 1830 нчы елларда Карл Клаус һәм Н. Н. Зинин нигез салган һәм бөтен дөньяга танылган Казан химия мәктәбе тарихы белән тыгыз бәйләнгән. Биредә химик һәм химик-технологлар академиклар: А. Е. Арбузов һәм Б. А. Арбузов; профессорлар: Г. Х. Камай, А. Ф. Герасимов, А. Я. Богородский, П. А. Кирпичников, В. С. Абрамов, А. Д. Николаева; күренекле математиклар Х. М. Мөштәри һәм И. Д. Адо һәм башка бик күп күренекле галимнәр, фәнне оештыручылар хезмәт куйган. Фән һәм инженерлык эше традицияләре КМТТУ кафедраларында һәм фәнни бүлекчәләрендә бүген дә саклана һәм үсә.

Уку йорты үзенең тәрбияләнүчеләре белән хаклы рәвештә горурлана. Алар арасында СССР ФА (фәннәр академиясе) академигы В. В. Кафаров, СССР һәм ТР ФА әгъза-корреспондентлары: П. А. Кирпичников, С. Р. Рәфиков, И. В. Торгов, Б. М. Михайлов, Ю. С. Клячкин; СССР, РФ һәм ТР Ленин һәм Дәүләт премияләре, СССР МС (министрлар советы) премиясе лауреатлары: Л. М. Бейкин, С. Г. Богатырев, Р. С. Гайнетдинов, С. Н. Косолапов, В. Г. Шацилло, А. И. Сидоров, В. А. Шишкин, А. Г. Лиакумович, А. Д. Николаева, X. Э. Харлампиди, В. Ф. Сопин, А. Ф. Махоткин һ.б. бар. Университетта зур галимнәр, РФ һәм ТРның атказанган фән эшлеклеләре, Татарстан һәм Россия фәннәр академияләренең хакыйкый әгъзалары һәм әгъза-корреспондентлары эшли. Алар инде булган фәнни мәктәпләрнең абруен күтәрүгә һәм яңа фәнни мәктәпләр барлыкка килүгә ярдәм итә.